Ish-anëtari i bandës së Gaxhait, Armando Sulejmani i cili njihet me nofkën ”Çipuri” është arrestuar këtë të enjte në zonën e Spitallës, ku i është kërkuar të ndalonte automjetin me të cilin udhëtonte.
Ai nuk ka dëgjuar urdhrin e policëve dhe ka shtuar shpejtësinë. Autoritetet i janë vënë nga pas dhe bënë të mundur ndalimin e tij. U zbulua se automjeti tip “Mercedes Benz” që ai udhëtonte mbante targa të vjedhura nga një “Land Rover”, i vjedhur më datë 3 nëntor 2023, në Tiranë. Armando Sulejmani 48 vjeç nga Vlora është dënuar edhe më parë për vrasje.
Gjithashtu, u shpall në kërkim 26-vjeçari L. Z. nga Tirana, pronar i automjetit që drejtonte 48-vjeçari, i dyshuar si bashkëpunëtor në vjedhjen e automjetit tip “Land Rover”. Automjeti tip “Mercedes Benz”, targat e tij dhe targat e vjedhura u sekuestruan në cilësinë e provës materiale, bashkë me një kaçavidë dhe 3 celularë.
Sulejmani është konsideruar nga policia si person me rrezikshmëri të lartë dhe dyshohet se po përgatitej të përfshihej në ngjarje kriminale. Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme.