Policia e Krimeve Ekonomike ka arrestuar gjykatësin e Gjykatës Themelore në Pejë, Sali Berisha, nën dyshimet se ka kryer veprën penale të keqpërdorimit të detyrës zyrtare. Arrestimin e gjykatësit Berisha e ka konfirmuar kryetari i kësaj gjykate, Sami Sharraxhiu.
“Nga krimet ekonomike në Prishtinë është arrestuar gjykatësi Sali Berisha. Nuk e di për çfarë vepre penale, por mund t’ju konfirmoj se është arrestuar”, ka thënë Sharraxhiu për “Betimi për Drejtësi”.
Arrestimin e tij e ka konfirmuar edhe zëdhëdhësi i Prokurorisë së Shtetit, Ekrem Lutfiu, i cili ka thënë se arrestimi i tij është bërë nën dyshimin për shpërdorim detyre.
