“Nëse kryeministri Edi Rama kërkon edhe institucionin e Presidentit që ta zotërojë, atëherë unë mendoj se jemi në një proces “Erdoganizimi”.
Kështu u shpreh analisti Artur Zheji në emisionin “Top Talk” në Top Channel teksa komentonte përplasjen midis kryeministrit Rama dhe presidentit Meta. Sipas tij, Komisioni Hetimor Parlamentar tregon që Rama e do për vete edhe institucionin e kreut të shtetit.
I pyetur se kush mund të ishte Presidenti i ri i Shqipërisë, në rast të shkarkimit të Metës, Zheji u përgjigj: “Gramoz Ruçi. Pse jo? Atij i përket. Pse ti mendon se do e peshkojë presidentin e ri nga opozita?”
Zheji është i mendimit se konflikti i vërtetë është midis Edi Ramës dhe Ilir Metës, e jo me Lulzim Bashën, i cili gjithsesi do të dalë i fituar nga kjo situatë.
“Gjëja më e re që do të jetë finalizimi i një konflikti radikal midis Ramës dhe Metës, ose mbajtja e këtij konflikti pezull derisa të ketë një negociatatë të vërtetë midis Ramës dhe Metës dhe jo midis Ramës dhe Bashës. Konflikti i vërtetë që do të shpërthejë nga ora në orë do të jetë Rama-Meta dhe jo Rama-Basha se nuk ka konflikt, por nuk kanë as dialog”, deklaroi Zheji.