Edhe pse janë vendosur një sërë masash të reja për të synuar stabilizimin e tregjeve pas pushtimit të Ukrainës nga Rusia, çmimi i naftës vazhdon të rritet pa u ndalur. Kështu, nafta e papërpunuar Brent, ka shënuar këto kohë rritjen më të madhe të saj në shtatë vjetët e fundit duke u përllogaritur në 110 dollarë për fuçi.
Mësohet se kjo rritje ka ardhur pasi anëtarët e Agjencisë Ndërkombëtare për Energji kanë rënë dakord që të lëshojnë në treg 60 milionë fuçi naftë nga rezervat emergjente. Shtetet e Bashkuara dhe 30 vende tjera anëtare të kësaj Agjencie deklaruan se ky veprim i ndërmarrë synon të stabilizojnë tregjet.
Rusia është një prej prodhuesve më të mëdhenj të energjisë në botë. Pas shpërthimit të luftës në Ukrainë, gjithë globi është shqetësuar për ndikimin e kësaj situate në tregjet e naftës dhe gazit.
Çmimet e naftës janë rritur edhe në Shtetet e Bashkuara duke arritur vlerën 109 dollarë për fuçi.
“Ne jemi të përgatitur për të shfrytëzuar secilin mjet të mundshëm për të shmangur pengesat në furnizimet me energji si pasojë e veprimeve të presidentit rus, Vladimir Putin”, deklaroi zëdhënësja e Shtëpisë së Bardhë, Jen Psaki ditën e djeshme.
Ajo shtoi se Uashingtoni do të analizojë mundësi të ndryshme se si të shmangë varësinë për energji nga Rusia.