Lorenc Vangjeli ka renditur tre sfidat kryesore që sipas tij përballet sot shoqëria shqiptare.
I ftuar këtë të hënë në emisionin “Kontrast”, analisti u shpreh se shpopullimi, pabarazia në shpërndarjen e të ardhurave dhe kaosi urbanistik sot janë një klithmë që kërkon zgjidhje.
“Tre janë sfidat kryesore të shoqërisë tonë. Jo ajo që na del para skene, apo në tryezën e bukës siç është politika. E para është demografia. Janë mbi 200 mijë persona në 6 vitet e fundit që janë kryesisht të rinj apo qytetarë të shtresës së mesme që shkojnë drejt së panjohurës ku në rastin më të mirë edhe fëmijët e tyre do të quhen ‘fëmijë emigrantësh’. E dyta ka të bëjë me pabarazinë për shpërndarjen e të ardhurave. Edi Rama dikur fliste për një përqindëshin që ishte i pasur. Sot ky 1% është shumë më i pasur. Nëse dikush ka 10 milionë euro në xhep dhe dikush jeton me dy euro në ditë, nuk do të thotë se ata të dy kanë 1 milion e 2 euro. Por se njëri është më i pasur dhe tjetri shumë më i varfër. E treta, është mjedisi dhe prona. As pushtuesi që ka ardhur ka prerë, ka përdhunuar dhe ka vjedhur nuk e ka marrë tokën me vete kur ka ikur. Kjo klithmë urbanistike është sfida e tretë”, tha Vangjeli.