Si rrallë herë, Elon Musk ka folur për vdekjen tragjike të të birit dhe këtë e ka bërë në një postim në Twitter. Pronari i ri i rrjetit social, ka shkruar në një status:
“Fëmija im i parë vdiq në krahët e mi. Ndjeva rrahjet e fundit të zemrës. Nuk kam mëshirë për askënd që do ta përdorte vdekjen e fëmijëve për përfitime, politikë apo famë”.
Me këtë status, Elon Musk adresoi polemikën e ndalimit të llogarisë së konspiracionistit Alex Jones, i cili postoi në Twitter se të shtënat me armë në shkollën “Sandy Hook” në Amerikë, në fakt ishin lajme të rreme.
Elon Musk e lidhi vendimin e Twitter për të mos lejuar Alex Jones të postojë me ngjarjen dhe përjetimin e tij personal. Djali i parë i Musk, i quajtur Nevada Alexander, vdiq në vitin 2002, nga sindroma e vdekjes së papritur të foshnjave (SIDS).
Ndërsa në postimin e tij, konspiracionisti Jones, u shpreh se qeveria amerikane ndihmoi një inskenimin e një ngjarje tronditëse, si të shtënat me armë në një shkollë fillore.
Si pasojë e të shtënave, ndërruan jetë 20 fëmijë nga 6-7 vjeç dhe gjashtë anëtarë të stafit. Jones tha se kjo ishte një dredhi për të ndaluar shtetasit amerikanë të mbanin armë.