Tre persona janë shoqëruar nga Policia e Shtetit në lidhje me atentatin mafioz në Larushk të Fushë-Krujës, ku u vra 1 person dhe u plagosën dy fëmijë. Sipas policisë, janë kontrolluar tre banesa dhe janë shoqëruar 3 persona të cilët dyshohet se mund të kenë dijeni për ngjarjen. Nga breshëria e armëve në drejtim të banesës së Gentiann Bejtjas u vra kunati i tij Ramazan Sino 29 vjeç si dhe u plagosën dy fëmijët e mitur të Gentianit, 13 dhe 10 vjeç. Shënjestër e atentatit dyshohet se ka qenë pikërisht Gentian Bejtja, i cili u ka shpëtuar 3 atentateve të organizuara ndaj tij.
Njoftimi i Policisë
Në lidhje me informacionin paraprak të dhënë mbrëmë, për ngjarjen e ndodhur në oborrin e banesës së shtetasit G. B., ju bëjmë me dije se:
Ka ndërruar jetë si pasojë e plagëve të marra shtetasi R. S., 29 vjeç, si dhe janë plagosur dhe ndodhen në spital, nën kujdesin e mjekëve, dy të mitur të moshës 13 dhe 10 vjeç, (nipat e shtetasit R. S).
Me qëllim identifikimin dhe kapjen e autorit/ëve të dyshuar, shërbimet e Policisë kanë ushtruar 3 kontrolle në 3 banesa si dhe kanë shoqëruar 3 persona që mund të kenë dijeni për ngjarjen.
Në përfundim të veprimeve hetimore në lidhje me ngjarjen, do të ketë një njoftim për shtyp në vijim.