Ekaterina Duntsova, një prej gazetareve televizive më në zë në Rusi, ndalohet të kandidojë në zgjedhjet presidenciale të Marsit përballë Vladimir Putinit. Komisioni Qëndror i Zgjedhjeve në Moskë argumentoi se 40-vjeçarja ka pasur gabime në dokumentacionin e paraqitur që e bën të pavlefshëm aplikimin e saj.
Duntsova është një figurë popullore që po tërheq gjithnjë e më shumë vëmendje në opinionin publik rus. Ajo është kandidate e linjës pacifiste dhe fushatën e saj e ka përqëndruar tek kundërshtimi i luftës në Ukrainë. Ajo ka premtuar se nëse fiton zgjedhjet, gjëja e parë që do të bëjë është të tërheqë trupat ruse.
Duntsova i ka kërkuar publikisht Putinit të lirojë ata që ajo i quajti të burgosur politikë përfshirë edhe liderin e opozitës Aleksei Navalni.