Harta e re gjyqësore që heq shumë Gjykata në vend dhe lë vetëm një Gjykatë Apeli do të miratohet nga qeveria, por avokatët po mbajnë një protestë para Këshillit të Lartë Gjyqësor. Ata prej javësh kanë bojkotuar seancat gjyqësore, si edhe masat e sigurimit.
Kryetari i Dhomës së Avokatëve, Maks Haxhia tha se ky draft nëse miratohet do të dërgohet për t’u goditur në Gjykatën Kushtetuese. “Patjetër që do e çojmë në Gjykatën Kushtetuese. Ne jemi juristë, ajo është hapi i fundit që do ndërmarrim”, tha Haxhia. Kreu i Dhomës së Avokatëve foli dhe për ndëshkimin e disa prej avokatëve që thyen vendimin për bojkotin.
Kryetarja e KLGJ-së, Llagami u shpreh se ky është qëndrimi final, duke e bërë të qartë se harta nuk ndryshon. “Materiali iu propozua mbledhjes plenare ky është qëndrimi përfundimtar i KLGJ që ia çoi Ministrisë së Drejtësisë”.
Ministri i Drejtësisë, Ulsi Manja e mbështeti fort këtë hartë, duke dhënë sinjale se qeveria do e miratojë pavarësisht protestave të avokatëve. Këshilli i Lartë Gjyqësor dhe Ministria e Drejtësisë, nuk kanë ndërmend që të bëjnë asnjë hap pas, edhe pse avokatët e Shqipërisë, opozita dhe deputeti socialist janë kundër.
Pra vendi do të ketë një Gjykatë Apeli, dhe ku nuk dihet se për ca vite mund ti vijë rradha një qytetari. Shqipëria është një vend që problemet me drejtësinë i ka të vjetra, dhe besueshmëria është e pakët. Reforma në Drejtësi këtë herë prodhon një ngërç, e jo një zgjidhje.
