Ndryshe nga disa Dhoma Avokatie në disa qarqe të vendit, Dhoma Vendore e Avokatisë në Dibër nuk e ka vazhduar bojkotin e seancave gjyqësore në Gjykatën e Dibrës dhe atë të Matit.
Në të dyja këto gjykata janë zhvilluara këtë të hënë normalisht seancat gjyqësore me avokat, shumë prej të cilave ishin shtyrë javën e kaluar. Avokatët e Matit dhe të Dibrës kanë marrë pjesë në seancat e tyre të mbrojtjes, duke zbatuar vendimin e dhomës së avokatisë.
Kreu i Dhomës së Avokatisë Dibër Ismail Uka tha se është në pritje të Këshillit Drejtues të Dhomës së Avokatisë së Shqipërisë që të vendosë se si do të vijojë kundërshtimi i hartës së re gjyqësore, pas kërkesës zyrtare që i është drejtuar Këshillit të Ministrave.
Ndryshe nga Dhoma e Avokatisë së Dibrës, në shumë qarqe të tjera si Korça, Shkodra e Lezha avokatët kanë vijuar bojkotin madje kanë lajmëruar edhe protest, për të kundërshtuar miratimin e hartës së re gjyqësore.