Sokol Hazizaj, avokati i Alqi Bllakos thotë se ka patur tentativa nga SPAK për ta shndërruar ish-deputetin në bashkëpunëtor të drejtësisë.
Bllako akuzohet për aferën e inceneratorit të Fierit dhe Gjykata e Posaçme e ka lënë atë në “arrest me burg”.
Kjo, tha avokati për emisionin “Now” në Euronews, është një procedurë standarde e drejtësisë, por në rastin e ish-deputetit vjen edhe për shkak se “vullneti i Bllakos është i qartë për të marrë pafajësinë”.
Avokati i ish-deputetit të PS foli për paqartësi në kërkesën e SPAK dhe gjykatës për arrestimin e Bllakos.
Vonesa prej 12 orësh në arrestimin e ish-deputetit ka ardhur për shkaqe procedurale në ekzekutimin e vendimit të gjykatës.
“Vendimi i gjykatës shoqërohet me disa veprime procedurale që duan kohën e tyre”, u shpreh Hazizaj.
Bllako, – shtoi ai – ka shprehur vullnet të plotë për t’u përgjigjur para organeve të drejtësisë i bindur në pafajësi.
Sipas tij, akuza është për korrupsion dhe shpërdorim detyre si funksionar i lartë shteti, në një kohë kur nuk ka pasur janë pozitë të tillë.
“Alqi Bllako nuk ka qenë funksionarë i lartë publik në momentin që ka qenë Sekretar i Përgjithshëm i Ministrisë së Mjedisit. Në ligjin e Nëpunësit Civil dhe ligjin për rregullimin e pagave, Sekretari i Përgjithshëm nuk përbën funksionarë të lartë publik”, tha Hazizaj.
Sipas tij, Bllako në detyrën pranë Ministrisë së Mjedisit ka kryer akte në përputhje me ligjin e nëpunësit civil.
“Aktet e Alqi Bllakos janë vetëm vijë përcjellëse e Ministrisë së Mjedisit”, tha avokati.
Për punësimin e babait të Bllakos, në një kompani për ndërtimin e inceneratorit të Fierit, Hazizaj tha se ka ndodhur para se Bllako të ishte Sekretar i Përgjithshëm.
Alqi Bllako u arrestua në orën 03:30 të datë 1 prill për korrupsion dhe shpërdorim detyre në aferën e inceneratorit të Fierit.
SPAK akuzon se ish-deputeti ka kryer falsifikim në rastin e shpronësimit të tokës ku u ndërtua inceneratori.