Në Kuvend votohet sot për anëtarin e zgjedhur nga ky institucion për Gjykatën Kushtetuese, teksa kreu i grupit parlamentar socialist Taulant Balla në fjalën e tij i është përgjigjur kërkesës së presidentit Meta, duke i kërkuar këtij të fundit të flasë troç dhe të heqë maskën.
Sipas Ballës, Meta nuk ka hall as me afatet dhe as me Kushtetutën por ai akuzoi drejt për drejtë se Presidenti dëshiron të çojë në Gjykatën Kushtetuese bashkëjetuesen e ish deputetit të PD-së, Enkelejd Alibeaj.
“Presidenti të heqë maskën dhe të flasë troç, nuk ka hallin e afateve as të Kushtetutës, ai ka ngulmuar që lista nga KED ti shkojë me 4 veta, se është renditur një person që ai ka besim, ka njohje. Ai do të cojë në Kushtetuese bashkëjetuesen e Alibealjt”- tha Balla.
Duke folur për afatet, Balla ka theksuar se Kuvendi është brenda afatit, gjë që nuk është e njëjtë për presidentit: “Ka dalë sot nga kafja me njërin që e pi përditë dhe thotë Kuvendi është me vonesë, po si mor lum miku, ne na ka ikur afati qe jemi brenda afatit, nderkohe qe ty që të ka ikur afati ti qenke në rregull. Më 3 nëntor i ka mbarur afati Presidentit, shpikje e re kjo që presidenti paska të drejtë të pezullojë afatin, me këtë precedent ai thotë pezulloj afatin 5 vjecar të presidentit dhe e bëj 50 vjet, deri kur të më teket mua”- tha Balla.
Ndaj tij reagoi deputeti i opozitës së re Ralf Gjoni, i cili i kërkoi të mos merret me Presidentin në këtë seancë, pasi kërkohet të votohet anëtari i zgjedhur nga Kuvendi.