Kreu i grupit parlamentar të PS-së, Taulant Balla, ka bërë publike një video ku vërehet një zonjë e moshuar që ankohet se protestuesit në Gjirokastër i kishin zënë rrugën, ndërsa ajo kërkonte lirimin e saj pasi do nisej për në Greqi.
Në videon e postuar në profilin e tij zyrtar në rrjetin social Facebook, Balla shkruan se përgjegjësi i bllokimit të rrugës është ish kryekomunari i Lazaratit dhe kryetari i PD-së së Gjirokastrës aktualisht.
Gjatë mbasdites së sotme, opozita e bashkuar bllokoi akset kryesore në 12 qarqe të vendit. Këto bllokime për rreth dy orë sollën dhe irritimin e shumë udhëtarëve të cilët kishin edhe urgjenca.
Gjatë protestës në Gjirokastër, udhëtarët u përplasën me protestuesit për shkak të bllokimit të rrugës.
Disa persona që po udhëtonin drejt Greqisë zbritën nga autobusi dhe debatuan ashpër me militantët e PD-së, pasi kërkonin lirimin e rrugës.
Udhëtarët pretendonin se në autobus kishte edhe persona të sëmurë, ndërsa të tjerë kanë deklaruar se nuk mund të arrinin autobusin e radhës në destinacionin tjetër.
Ndër udhëtarët e acaruar, ishte edhe një zonjë e moshuar e cila debatoi ashpër me protestuesit. Në videon e postuar nga Balla, shihet se si e moshuara po debaton me militantët e PD.