Ministri Taulant Balla dënoi sjelljen e opozitës pas përfundimit të seancës plenarë, duke deklaruar se sjellja e demokratëve nuk ka të bëjë me vendimin e gjykatës për Salianjin.
Ai theksoi se kjo sjellje përsëritet sa herë që Shqipëria përafrohet drejt BE-së, siç është edhe hapja e kapitujve.
Balla theksoi se kjo është situatë e përsëritur e opozitës, por qytetarët nuk mund të manipulohen.
“Kush mendon që kjo sjellje ka të bëjë me një vendim të caktuar gjykata e ka gabim dhe kush mendon se i merr shqiptarët për budallenj e ka shumë gabim. Kemi një situatë që unë mendoj se edhe qytetarët e kanë parë shpesh”, tha ai.
Ai bëri edhe një apel për demokratët, duke iu bërë thirrje të mos përdorin dhunën, por fjalën.
“Apeli im si koleg, deputet prej 20 vitesh në Kuvend, është që dhuna nuk ka vend në demokraci. Nëse unë do të isha deputet i opozitës do ta përdorja nderin e madh që më kanë dhënë qytetarët për të folur në kuvend”, shtoi ai.
Nga ana tjetër, Balla theksoi se vendimet e gjykatave duhen respektuar.