Kreu i Grupit Parlamentar të Partisë Socialiste, Taulant Balla, i ka bërë thirrje protestuesve që të distancohen nga aktet e dhunës dhe të mos ushtrojnë presion ndaj deputetëve gjatë protestës së zhvilluar jashtë Kuvendit.
Nga foltorja e Parlamentit, Balla u shpreh se çdo tentativë për të penguar ushtrimin e detyrës kushtetuese të deputetëve është e papranueshme, duke theksuar se Kuvendi do të vijojë punën në funksion të procesit të integrimit europian.
Ai komentoi gjithashtu edhe mungesën e Partisë Demokratike në seancë, duke u shprehur se opozita është tërhequr për shkak të situatës jashtë Kuvendit.
“Ne do t’i votojmë të tre këto ligje, të cilat janë pjesë e detyrave të shtëpisë. Për këtë na kanë zgjedhur qytetarët shqiptarë. Ende nuk i dimë arsyet pse Partia Demokratike e ka bojkotuar këtë seancë, por shpresoj shumë që të jetë e pranishme në seancat në vijim”, deklaroi Balla.
Në përmbyllje të fjalës së tij, ai theksoi se Kuvendi do të vijojë mandatin deri në vitin 2029, ndërsa Grupi Parlamentar i Partisë Socialiste, sipas tij, do të qëndrojë besnik ndaj votave të qytetarëve që e kanë mbështetur.