Ministri i Brendshëm Taulant Balla priti këtë të hënë një delegacion gjerman të kryesuar nga Johann Saathof, Sekretar Shteti në Ministrinë Federale për Punët e Brendshme dhe Komunitetet, me të cilin diskutoi çështjet e bashkëpunimit dypalësh, si dhe tema që lidhen me takimin ministerial që zhvillohet të martën në Tiranë.
Sekretari Saathof konfirmoi mbështetjen e Gjermanisë Federale për vendet e Ballkanit Perëndimor që janë pjesë e nismës së “Procesit të Berlinit” dhe vuri në dukje angazhimin e spikatur të Shqipërisë lidhur me problematikat e migracionit të parregullt.
Ministri Balla falenderoi palën gjermane për mbështetjen e dhënë deri më sot, sidomos sa i përket mbështetjes ndaj agjencive ligjzbatuese në luftën kundër krimit të organizuar.
Balla nënvizoi edhe bashkëpunimin e shkëlqyer që ekziston mes dy policive, Policisë së Shtetit dhe Policisë Federale të Gjermanisë, të cilat kanë zhvilluar disa operacione të përbashkëta.