Një 62-vjeçar ka rënë në prangat e Policisë në Përmet, pasi dyshohet se kishte përshtatur një ambient të banesës së tij në fshatin Qilarisht si thertore të paligjshme, ndërsa mbetjet e therjes i shkarkonte në lumin Vjosë, duke ndotur mjedisin.
Operacioni u zhvillua nga shërbimet e Komisariatit të Policisë Përmet dhe Seksioni për Hetimin e Krimeve Ekonomike dhe Financiare, në bashkëpunim me Autoritetin Kombëtar të Ushqimit (AKU) Gjirokastër, pas informacioneve se në këtë ambient ushtrohej aktivitet jashtë kushteve minimale higjieno-sanitare.
Gjatë kontrollit në banesën e shtetasit me inicialet A. L., policia konstatoi një ambient të përshtatur si thertore për bagëti të imta, ku u gjetën dhjetëra kafshë në proces therjeje dhe të tjera të therura. Gjithashtu, u sekuestruan dhjetëra matrikuj bagëtish, të dyshuara si të falsifikuara.
Sipas policisë, në ambient u zbulua edhe një tubacion përmes të cilit mbetjet e therjes derdheshin direkt në lumin Vjosë, duke shkaktuar ndotje të ujërave.
AKU bllokoi menjëherë ambientin ku zhvillohej aktiviteti i paligjshëm dhe ndëshkoi pronarin me një masë administrative prej 200 mijë lekësh të rinj.
Në përfundim të veprimeve hetimore, 62-vjeçari u arrestua në flagrancë për veprat penale “Fshehja e të ardhurave”, “Prodhimi i kundërligjshëm i artikujve dhe mallrave industriale dhe ushqimore”, “Falsifikimi i vulave, stampave ose formularëve” dhe “Ndotja e ujërave”.
Po ashtu, u proceduan penalisht dy veterinerë, shtetasit me inicialet L. D., 54 vjeç, dhe Y. H., 66 vjeç, të dy banues në Përmet, për veprën penale “Shpërdorimi i detyrës”, pasi dyshohet se nuk kanë ushtruar kontrollet dhe nuk kanë marrë masat ligjore për bagëtitë e 62-vjeçarit.
Materialet procedurale i janë referuar Prokurorisë për veprime të mëtejshme.