Barcelona ka kuptuar se ka bërë një gabim shumë të madh në verë, kur shpenzoi 40 milionë euro për brazilianin Malkom. Ky i fundit luan me “pikatore” e ndonëse shihet si një talent premtues, është larg pritshmërisë që ka një klub si Barcelona. Ndaj në klub po mendojnë si të zgjidhin këtë telash që i bëri armiq me skuadrën e Romës, të cilës ia “vodhën” praktikisht në aeroport kur priste lojtarin për firmën. Prej disa javësh, klubi ka lënë të kuptohet se është gati të dëgjojë oferta për futbollistin dhe një e tillë i ka mbërritur këto ditë na Anglia. Klubi i Everton, një prej atyre që e ndiqte që në verë futbollsitin kur ishte pejsë e Bordo, ka bërë të ditur se është gati të negociojë për transferimin e tij.
Por mediat spanjolle kanë zbuluar se Malkom as nuk dëshiron të dëgjojë për oferta në adresë të tij. Ai i ka komunikuar klubit katalanas se nuk ka ndër mend të largohet dhe se do të vazhdojë të luftojë për të pasur shansin e tij të paktën deri në fund të këtij sezoni. Këtë, përfaqësuesi i lojtarit ua ka thënë edhe drejtuesve të Evertonit, të cilëve në fakt u ka premtuar se nëse situata nuk do të ndryshojë deri në verë, atëherë ai do të jetë i gatshëm t’i takojë.