Kryetari i Grupit Parlamentar të PD, Gazment Bardhi fajëson socialistët se krijuan ngërç në funksionimin normal të seancës plenare.
Ai lajmëroi se opozita është e vendosur që të mos lejojë normalitetin në seanca plenare, me argumentin se mazhoranca ka vendosur asgjësimin e opozitës.
Ai renditi dhe arsyet që sipas tij tregojnë se opozita nuk po lejohet që të kryejë veprimtarinë e saj si duhet.
“Së pari Kryetarja e Kuvendit të ndërpresë ndërhyrjen në punët e brendshmë të Partisë Demokratike. Të lejohen deputetët e opozitës të caktojnë përfaqësuesit që dëshirojnë në Komisionet Parlamentare pa diktim nga ana e maxhorancës. Çuçi ka thënë se Reforma Zgjedhore është çështje politike, jo është çështje e qytetarëve. Pse duan të ndryshojnë praktikën parlamentare? Sepse nuk duam opozitën në Reformën Zgjedhore. Kjo është një e drejtë e opozitës. Duhet të lejohen 43 deputetët e opozitës të ushtrojnë kontrollin ndaj qeverisë. Ata nuk mund ta grisin Kushtetutën e Republikës së Shqipërisë. Nuk mund të pengojnë opozitën. Nuk mund të pengojë opozitën të hetojë vendimmarrjet. Nëse do të duhet që parlamenti të funksionojë normalisht duhet që deputetët e opozitës të lejohen të bëjnë punën e tyre. Maxhoranca ka vendosur asgjesimin e opozitës, ne jemi të vendosur të mos lejojmë normalitetin në seanca plenar. Duam të kemi bashkëjetesë normale në seancë plenare. Apeli im është për kolegët e maxhorancës”, tha Bardhi.