I pari që ka reaguar sot në lidhje në deklaratën e kreut të opozitës, Luzlim Bashës për bllokimin e rrugëve për protestat në ditët në vijim, ka qenë deputeti i PS-së, Taulant Balla.
Ai ka sugjeruar të mos merret seriozisht por njëkohësisht paralajmëron kreun e PD-së të mos i shkojë në mend të bllokojë rrugët sepse shqiptarët kanë plot halle. Ai i ka cilësuar si të papërgjegjshme deklaratat e Bashës dhe thotë se çdo përpjekje për destabilizim është kundër interesave të Shqipërisë.
“Lojërat e vitit 1997 dhe rreziqet që ato mbartin në vetvete nuk duhen rikthyer më në Shqipëri. Shqiptarët nuk meritojnë të kenë drejtues politikë të cilët vënë interesin e tyre politik mbi interesin e Shqipërisë sepse interesi politik i Lulzim Bashës sot është mospjesëmarrja në zgjedhje për shkak të frikës nga Vettingu dhe frikës nga rezultati i zgjedhjeve.
Të kesh frike nga vota e popullit do të thotë të mos dish të respektosh popullin tënd, atë popull që të ka dhënë mandatin për të qeverisur. Edhe pse nuk i marr seriozisht deklaratat e Lulzim Bashës dua t’i them se është mirë të mos i çojë ndërmend ato deklarata të papërgjegjshme që ai i hedh si shashka.
Shqiptarët sot kanë nevojë për vende pune dhe kush është kundër Vettingut edhe kundër vendeve të punës së shqiptarëve; kush është për qeveri teknike është kundër ekonomisë së Shqipërisë, çka do të thotë sërish kundër vendeve të punës. Të mos ta çojë ndërmend Lulzim Basha të bllokojë rrugët sepse shqiptarët kanë plot halle, njerëzit duhet të shkojnë në punë, në shkolle apo në spitale. Çdo përpjekje për destabilizim është kundër interesave të Shqipërisë”, ka deklaruar Balla. /tirananews/