Basha kërcënon hapur anëtarët e KQZ-së: Ju pret burgu

Lulzim Basha kërcënoi anëtarët e shumicës në Komisionin Qendror të Zgjedhjeve duke filluar nga n/kryetari Denar Biba, pasi KQZ-ja injoroi dekretin e Presidentit për anulimin e zgjedhjeve të 30 Qershorit. Basha tha se do të përgjigjen para drejtësisë dhe se i pret burgu, ndërsa e cilësoi edhe njëherë nul dhe farsë 30 Qershorin. “Farsa e 30 Qershorit është një grusht kriminal institucional i Edi Ramës për të pushtuar pushtetin vendor, për të shkatërruar KQZ-në dhe gjithë sistemin e administrimit të zgjedhjeve, përfshi Kolegjin Zgjedhor. Të gjithë ata që u bënë pjesë e këtij grushti kriminal institucional, me në krye ikonat e hajdutërisë dhe paligjshmërisë si Denarbibat që i shërbyen Edi Ramës për të dhunuar Kushtetutën dhe ligjin me 30 qershor, do të përgjigjen para drejtësisë për veprimet e tyre kriminale. Burgu i pret dhe nuk ka bandit e Bablok t’i shpëtojë”- u shpreh Basha në Përmet.