Ish-kreu i Partisë Demokratike, Sali Berisha nga Lushnja ka reaguar ashpër ndaj vendimit të Lulzim Bashës për t’i ndërprerë mandatin drejtuesve të forumit rinor të PD. Pak orë pasi Basha shpalli zgjedhjet e reja për forumin, Berisha iu bëri thirrje të rinjve të ngrihen kundër këtij vendimi.
“Ka vendosur pa pyetur udhëheqjen e rinisë së PD në kokë të tij, krijimin e një komisioni për të bërë zgjedhjet në forumin rinor, një akt stalinist i turpshëm. Në këtë formë si ka vepruar sot kryetari pa parti, s’ka vepruar njeri.”
Berisha ka akuzuar Bashën se po e redukton PD në një ministri të Edi Ramës.
“U tradhtoi ju, mundin tuaj, PD, sot në vend të masakrës zgjedhore ka marrëveshjen për të shndërruar PD, në partinë e narkoshtetit. Nuk vjen dot tek ju, ka frikë nga ju. Ai është një peng i Edi Ramës”
Berisha ka replikuar në distancë edhe me Shtetet e Bashkuara të Amerikës, duke theksuar se ai është njeriu më i votuar në Shqipëri në 3 dekada.
“Kjo beteje do jetë e suksesshme, se askush nuk beson kur ti thua unë kam prova po nuk i them.”
Ish-kryeministri iu ka bërë thirrje demokratëve të bashkohen në 11 dhjetor në Kuvendin e rithemelimit të partisë.