Kreu i PD-së Lulzim Basha mbylli protestën e radhës të opozitës në selinë blu ku kërkoi falje për gabimet e të shkuarës, kur demokratët ishin në pushtet.
“Kjo është beteja për të cilën luftojmë dhe do ta vazhdojmë deri në fitore, deri në çlimin e Shqipërisë nga grushti i shtetit që ka kapur parlamentin, ka asgjesuar demokracinë dhe ka blerë ekranet kryesore të shtetit. mirënjohje për gazetarët, turp për pronarët e mediave. Ndjesë për ata që u bënë milionerë në pushtetin tonë. Ne e dimë se beteja që bashkë kemi nisur do ta përfundojmë bashkë, por bregu i lirisë dhe demokracisë nuk mundt ë pranojë më kurrë gabimet e të kaluarës, duhet ti kthejë pësimet në mësime. Për këtë zotohem sot”, tha Basha në fjalën e tij.
Ai shtoi se askush nuk është në këtë protestë për karrige apo pushtet, e aq më pak për pazare. “Por për t’i dhënë njëhërë e mirë fund pazareve në kurriz të popullit, demokracisë, i vetmi Pazar që ka mbetur në Tiranë është pazari i gjësë së gjallë, kopja e shëmtuar e pazarit të Milotit, që po e merr përpara vala e shqiptarëve të bashkuar”, tha Basha.