Është koha për ndryshim është shprehur kreu i PD-së lulzim Basha gjatë një takimi në Dibër. Ai tha se jetike është ndalimi i projektit të Edi Ramës për shpopullimin e Shqipërisë.
“Sot kriza ekonomike është problem numër 1 për çdo familje shqiptare, ndaj dhe prioriteti numër 1 për ne demokratët është t’i japim zgjidhje problemeve jetike për çdo shqiptar. Ta bëjmë këtë një orë e më parë dhe të ndalim zbrazjen e vendit, spastrimin e Shqipërisë nga shqiptarët e ndershëm, projektin më të zi të Edi Ramës.”- u shpreh zoti Basha.
“Dy herë janë spastruar shqiptarët në histori: nga Sllobodan Millosheviçi në Kosovë dhe janë 400 mijë shqiptarë të spastruar nga regjimi kriminal i Edi Ramës, të spastruar nga politikat e represionit, të terrorit, të shpunësimit, të gjobave, të rritjes së kostos së jetës, rritjes së çmimeve. Ne jemi të vendosur ta ndalim këtë projekt- theksoi lideri i opozitës, i cili u shpreh se mbështetja me investime është projekti më i mirë për ndaljen e shpopullimit. “Nëqoftëse projekti i Edi Ramës është shpopullimi i Shqipërisë, ne do të kemi projekt kryesor ndaljen e këtij projekti, mbështetjen e Veriut me investime, me rritje ekonomike, politika punësimi dhe t’i japim dorën biznesit të vogël, të rihapim shkollat dhe universitetet e mbyllura, për ta kthyer Shqipërinë në shinat e rritjes ekonomike”- deklaroi kreu i opozitës.
Lideri i opozitës u shpreh se referendumi “Rama ik” i 30 qershorit ndodhi në kushtet kur Shqipëria është në kolaps total ekonomik për shkak të babëzisë dhe hajdutërisë së Edi Ramës. “Kjo qeveri është një bande që i është vërsulur buxhetit të shtetit, pasurive të shqiptarëve dhe ka kthyer çdo institucion të shtetit në një instrument vjedhjeje, duke nisur me Parlamentin e duke përfunduar me drejtorinë më të fundit të Shqipërisë.”