Kaosin që prej 5 muajsh në Kuvend e bënte grupi i Rithemelimit në PD, sot po e bën i vetëm Lulzim Basha. Për bllokim të foltores dhe të thyerjes së rregullave, kryeparlamentarja Lindita Nikolla e ka përjashtuar nga seanca e sotme plenare.
Basha: Në mungesë të ideve batutat e shpikura me steroide që dëmtojnë edhe trangujt e Myzeqesë nuk bëjnë mirë. Pse keni frikë të shpreheni para qytetarëve? Gënjeshtra i ka hedhur thellë rrënjët në këtë sallë dhe ka helmuar frytet që dalin nga kjo sallë. Qofshin këto ligje apo vendime. Qofshin këto diskutime që nuk i shërbejnë publikut. Kjo nuk është arsye që t’u drejtohemi shqiptarëve.
Pavarësisht paralajmërimeve të Nikollës që të lirojë foltoren pasi në senacë do diskutohej rendi i ditës, Basha nuk u tërhoq. Kryeparlamentarja e përjashtoi nga seanca dhe dha 5 minuta pushim ne kërkesë të kreut të grupit të PS-së, Bledi Çuçit.
“Ju lutem lironi foltoren se do ju përjashtoj nga seanca. Ju lutem lejoni foltoren. Nuk ua jap fjalën. Kur shoh që nuk i përmbaheni procedurës kam të drejtën t’iu heq fjalën sipas rregullores. Mos pengoni rendin e ditës. Do vijojmë me rendin e ditës. Jeni i përjashtuar nga seanca për zaptim të Foltores. Jeni i përjashtuar”, tha Nikolla. Kjo është hera e parë që Basha përjashtohet në 19 vite që ai është deputet. Me ndryshimet e rregullores, Basha rrezikon përjashtimin deri në 60 ditë.