Gati 1 javë më parë basketbollisti legjendar, Kobe Bryant, ndërroi jetë pas një aksidenti fatal me helikopter, së bashku me vajzën e tij, Gianna. Kjo ngjarje tronditi gjithë botën, por mbi të gjitha bashkëshorten, Vanessa dhe familjarët e tij.
Ditën e sotme Vanessa e ka kujtuar bashkëshortin e saj përmes një postimi shumë të ndjerë në “Instagram”. Ajo ka publikuar në rrjetin social një foto të Kobe dhe ka treguar se sa shumë i mungon partneri i saj.
“Shoku im i ngushtë. Babai më i mirë. Më mungon shumë. I bukur. I ëmbël. Qesharak. Bashkëshort i dashur. Më mungon të më thuash ‘Mirëmëngjesi princeshë/mbretëreshë’”, ka shkruar Vanessa në postimin e saj.
Më pas bashkëshortja e basketbollistit të ndjerë publikoi një video homazh të përgatitur nga “Extra”, në të cilën Bryant flet për punën e tij të parë dhe shumë të tjera.
Kobe dhe Gianna ishin ndër 9 personat që ndërruan jetë nga përplasja e helikopterit në një kodër në Calabasas.