Zyra e Mbrojtjes Civile pranë Bashkisë Bulqizë kanë verifikuar deri tani 171 banesa dhe 8 pallate të dëmtuara nga tërmeti në të gjithë territorin e kësaj bashkie.
Prefekti i Qarkut Dibër i cili është edhe kryetar i Shtabit të Mbrojtjes Civile në këtë rajon, Nexhbedin Shehu tha se 2 pallate të dëmtuara janë në qytetin e Bulqizës, njëri në Qytetin e Ri dhe tjetri në Lagjen e Vjetër, ndërsa 6 pallate janë dëmtuar në qytetin e Krastës, pallate të cilat sipas Shehut kanë qenë të amortizuara prej vitesh.
Sa i përket pallatit në Qytetin e Ri të Bulqizës, ku edhe pse ka qenë shpallur i pabanueshëm nga ekspertët e Institutit të Ndërtimit të Tiranës, Prefekti Nexhbedin Shehu tha se i ka kërkuar Bashkisë Bulqizë që të mos lejojë banorë të jetojnë në të për sa kohë ai është shpallur i rrezikshëm.