Këshilli i Bashkisë Mat miratoi sot me shumicë votash buxhetin e vitit 2025, i cili rezulton buxheti më i mirë i tri dekadave të fundit. Ai do të jetë 18 % më i madh se buxheti i kaluar.
Burime pranë Bashkisë Mat bënë me dije se transferta e pakushtëzuar (granti) do të jetë 318.292.945 lekë, të ardhurat 210.431.000 lekë, në total 528.723.945 lekë.
Mësohet se shtesa nga granti është 40.395.945 lekë, ndërsa shtesa nga të ardhurat e planifikuara që do të sigurojë bashkia është 50.431.000 lekë. Transferta specifike kap vlerën e 210.212.437 lekëve. Në total buxheti i planifikuar për vitin 2025 sipas burimeve të financimit rezulton te jetë 738.936.382 lekë.
Investimet zënë 24 % të buxhetit, nga këto: 85.489.138 nga granti, 85.545.949 nga të ardhurat dhe nga transferta specifike 9.504.770 lekë, në total 180.539.852 lekë.
Edhe në këtë mbledhje nuk munguan debatet dhe replikat mes këshilltarëve. 14 këshilltarë votuan pro buxhetit të ri dhe 3 kundër.
