Me anë të një videoje të publikuar në “Instagram”, këngëtarja Beatrix Ramosaj ka reaguar lidhur me sulmet e vazhdueshme me të cilat është përballur pas daljes nga shtëpia e Big Brother VIP. Trixa thotë se gjatë muajve të fundit ka patur shumë abuzime me emrin e saj dhe kjo e ka bërë të ndihet jo mirë.
“Kjo video është për të gjithë personat aty jashtë ku bashkë me mua kanë vuajtur nga bullizmi. Unë zgjodha të hesht duke menduar që e gjithë kjo ishte pasojë e pjesëmarrjes në një program ku jeta private bëhet publike, por ASGJË nuk është një justifikim për Cyber Bullying.
Unë nuk e meritoj, ti nuk e meriton, prandaj mos u nënshtro! Le të jetë ky një mesazh force që ti nuk je vetëm, por jemi bashkë. Duke i dhënë dorën e duke përkrahur njëri-tjetrin ta bëjmë këtë një botë më të mire,” ka shkruar këngëtarja krahas videos.
Por, një nga komentet që mori vëmendjen e të gjithëve ishte edhe ai i këngëtares Leonora Jakupi, e cila i ka dalë në mbështetje Trixës, duke thënë: “Ky është çmimi që duhet të paguajmë duke qenë njerëz publik. Të gjykojnë, të paragjykojnë, të shajnë, të përbuzin etj duke mos vënë veten asnjëherë në pozitën e tjetrit!
Bëhu vajzë e fortë ashtu siç je dhe krenare nga je, kush je dhe nga kush ke marrë gjithë këtë edukate mos e bukura Beatrix. T’i marshin të ligat ty ata që të bullizojnë”, shkruan Leonora.