Analisti dhe eksponenti i Partisë Demokratike, Besnik Mustafaj, u shpreh se kjo forcë politike ka burime të shumta njerëzore, dhe shumë herë më të mirë sipas tij se kreu aktual Lulzim Basha.
Komentet ai i bëri në studion e ABC Live ku ishte i ftuar për të komentuar zhvillimet në selinë blu.
Mustafaj tha se si pjese komisionit të verifikimit të kandidatëve ka parë mijëra CV. Mes tyre ai evidentoi se të paktën 500 mund të ishin kryetarë më të mirë se Lulzim Basha.
“Nëse nisemi nga faktet satutore Basha është i ikur sepse 44 mijë anëtarë kanë firmosur për shkarkimin e tij. Në këtë kuptim nëse Basha do të ndiqte filozofinë politike të Partisë Popullore Europiane ai duhet ta njihte veten si të shkarkuar. Nga ana tjetër a duhet të ikë Berisha? Unë jam i mendimit se tani për tani ai është e tashmja, duke qenë motori që po ndërmerr këtë ndryshim të madh në PD. Por kurrsesi nuk mund të besoj se Berisha është e ardhmja e partisë. Janë dy etapa të ndryshme. Kur fillon e ardhmja, kjo mbetet për t’u parë pas marsit kur janë edhe zgjedhjet për kryetar në PD.
Në ndryshimet e reja statusore çka mua më bën optimist parashikohet gara, e hapur dhe reale. Duke u hapur gara jam i bindur se do të ketë evidentim personalitetesh të reja shumë energjike. Nëse hyjnë në garë tregojnë veten. I siguroj teleshikuesit tuaj se brenda PD ka potenciale, burime njerëzore të jashtëzakonshme.
Kam qenë në komisionin për përzgjedhjen e kandidaturave gjatë vjeshtës së kaluar, kam parë mbi 3 mijë CV, nga të cilat ju siguroj se janë të paktën 500 që mund të ishin kryetarë më të mirë se Basha. Ka shumë demokratë të shkolluar shumë mirë dhe me vullnet të madh për të mbështetur qëndrimet politike të qendrës së djathtë”, u shpreh Mustafaj.