Presidenti i vendit, Bajram Begaj ka folur sot për zgjedhjet lokale të 14 Majit, ku thekson se duhet që të jetë një proces zgjedhor i drejtë, i paanshëm, i bazuar në kushtetutë e ligj, detyrim thelbësor ndaj vendit. “Shit-blerja e votës, keqpërdorimi i burimeve shtetërore janë të patolerueshme”, duke shtuar se: “Financimet e paligjshme dhe jo transparente të partive politike, manipulimi zgjedhor janë të patolerueshme”. Po ashtu kreu i shtetit u bëri thirrje partive politike që të mos denigrojnë njëri-tjetrin.
“Media, aktor i rëndësishëm për garantimin e një proces sa më të lirë. Zgjedhjet, rol vendimtar për forcimin e besimit në institucionet e vendit dhe anëtarësimin në BE. Tek unë do të gjeni dëgjuesin e vëmendshëm, tek Institucioni i Presidentit mbështetje të palëkundur. Në asnjë rrethanë nuk duhet të shtrembërohet dhe tjetërsohet vullneti dhe vota e lirë”, theksohet në deklaratë.
Presidenti Begaj shton se: “Çdo intimidim apo shantazh duhet të denoncohet e dënohet!”, dhe se “Zgjedhjet nuk janë të partive politike, por janë për qytetarët shqiptarë, janë për Shqipërinë”.
Gjithashtu, Begaj bëri thirrje që subjektet të mos denigrojnë njëri-tjetrin. “Etika e garës dhe e komunikimit të rrezatojë qytetari, mirësjellje dhe respekt. Zgjedhjet kanë rol vendimtar për forcimin e besimit në institucionet e vendit dhe anëtarësimin në Bashkimin Evropian. Në asnjë rrethanë nuk duhet të shtrembërohet dhe tjetërsohet vullneti dhe vota e lirë. Çdo intimidim apo shantazh duhet të denoncohet e dënohet! Zgjedhjet nuk janë të partive politike, por janë për qytetarët shqiptarë, janë për Shqipërinë”, u shpreh Begaj.