Presidenti i Republikës, Bajram Begaj, priti këtë të hënë në Presidencë përfaqësuesit e Këshillave Ndërfetarë të Evropës (Religions for Peace Europe), të cilët ndodhen në Tiranë në kuadër të Forumit Evropian “Shared Sacred Flourishing”.
Gjatë takimit, kreu i shtetit e cilësoi forumin një platformë të rëndësishme për forcimin e dialogut ndërfetar dhe promovimin e paqes, mirëkuptimit dhe bashkëpunimit mes komuniteteve fetare në Evropë.
“Shqipëria përbën një model të harmonisë, bashkëjetesës ndërfetare si dhe mikpritjes. Këto vlera janë pjesë e identitetit tonë dhe uroj që, gjatë qëndrimit tuaj, t’i prekni nga afër”, u shpreh Begaj.
Presidenti u ndal edhe te periudha e diktaturës, duke theksuar se, ndonëse regjimi komunist e shpalli Shqipërinë vendin e parë ateist në botë dhe shkatërroi ose ndryshoi destinacionin e objekteve të kultit, nuk arriti të zhbënte besimin e shqiptarëve në Zot.
Begaj vlerësoi gjithashtu respektin për besimin e tjetrit si një nga vlerat themelore të shoqërisë shqiptare, si edhe rolin e Këshillit Ndërfetar të Shqipërisë në promovimin e dialogut dhe bashkëpunimit mes komuniteteve fetare.
Në përfundim të takimit, kreu i shtetit theksoi se, në një kohë kur bota përballet me sfida, polarizim dhe konflikte, dialogu ndërfetar mbetet një instrument i rëndësishëm për ndërtimin e urave të besimit, solidaritetit dhe paqes. Ai shtoi se Shqipëria do të vijojë të promovojë modelin e saj të harmonisë fetare dhe bashkëjetesës paqësore.