Ministri i jashtëm grek Giorgos Gerapetritis i dërgoi sërish një mesazh Shqipërisë lidhur me çështjen “Beleri” gjatë fjalimit të mbajtur në një konferencë ndërkombëtare.
Ai tha se Greqia “nuk mund të pranojë vende kandidate që nuk plotësojnë kriteret e anëtarësimit dhe kryesisht parimet thelbësore të bashkësisë evropiane si demokracia dhe shteti ligjor”.
“Shqipëria duhet të tregojë se respekton të drejtat e pakicës kombëtare greke dhe shtetin e së drejtës. Kjo konferencë po zhvillohet në një moment kyç. Në kohën e ardhshme, zgjerimi i BE-së do të jetë në krye të agjendave në institucionet e BE-së. Qëndrimi i qartë i Greqisë do të sjellë në këtë debat frymën e agjendës së Selanikut. Ne do të ndërmarrim iniciativa dhe do të miratojmë çdo ide apo propozim që synon rigjallërimin e procesit të zgjerimit, duke e bërë atë më konkret, konsistent dhe të besueshëm, duke siguruar gjithashtu bashkëpunim të sinqertë nga të gjitha palët dhe një afat kohor të qartë për anëtarësim”, tha ministri i Jashtëm grek.
Gerapetritis shtoi se Greqia nuk mund të pranojë vende kandidate që nuk përmbushin kriteret e anëtarësimit dhe parimet bazë të BE-së, si demokracia dhe shteti i së drejtës, referuar këtu Shqipërisë.
I pyetur mbi “çështjen Beleri”, Gerapetritis tha se arrestimi dhe mbajtja në burg e tij, “përbën një devijim nga e drejta evropiane”, si dhe “shkelje të qartë të të drejtave politike të zotit Beleri, shkelje të prezumimit të pafajësisë dhe të shtetit ligjor”.