Ndonëse vjen në Tiranë si eurodeputet, Fredi Belerit, është pritur me incidente nga qytetarët.
Ai ndodhet në Tiranë si një ndër 10 eurodeputetët që erdhën në Shqipëri në kuadër të takimit të 18-të të komisionit ndërparlamentar të stabilizim asociimit.
Një qytetar i është drejtuar Belerit duke i rikujtuar masakrën e Peshkëpisë, si dhe një nga të vrarët në atë ngjarje të rëndë.
Qytetari e quajti Belerin vrasës.
“A e mban mend Fatmir Shehun zoti Beleri? Turp të kesh! Rrugac! Vrasës!”, tha qytetari.
Sulmi, ndaj një reparti kufitar pranë fshatit Peshkëpi të Dropullit, katër kilometra brenda kufirit shqiptar, shënoi një ndër ngjarjet më të rënda në vendit tonë. Sulmi la pas dy ushtarë të vrarë shqiptarë dhe plagosjen e tre të tjerëve.
Masakra nisi në mëngjesin e 10 prillit 1994 dhe u mor përsipër nga formacioni paraushtarak i një grupi nacionalist grek që kërkonte bashkimin e një pjese të Shqipërisë së Jugut me Greqinë. Pika kufitare e Peshkëpisë kishte në ato kohë 130 rekrutë të rinj dhe të paarmatosur.
Ai formacion paraushtarak, i vetëquajtur Komandoja “Pirro I”, e quante veten krah i armatosur i lëvizjes për çlirimin e Vorio Epirit (MAVI). Ajo kishte zgjedhur si moment të duhur për të sulmuar, kohën kur i gjithë reparti kishte rënë në gjumë.
Në ora 02ː40 të mëngjesit, grupi i armatosur, tetë vetë me uniforma të ushtrisë greke dhe me maska, hynë në repart dhe vrasin ushtarin e rojes Arsen Gjini nga Semani. Pastaj dy persona me uniformë dhe maska hynë në korridorin e kazermës. Komandanti i stërvitjes, Fatmir Shehu, u foli të panjohurve, duke u kërkuar të kursenin ushtarët, por ata e qëlluan me armë duke e lënë të vdekur. Ajo njësi plagosi edhe tre ushtarë shqiptarë.