Zëdhënësja e fushatës së kandidatit të koalicionit “Bashkë Fitojmë” Belind Këlliçi, Silvi Bardhi, ka dalë në një deklaratë për mediat për të dhënë qëndrimin në lidhje me çështjen e diplomimit apo jo të kandidatit të Berishës për Bashkinë e Tiranës. Ajo tregoi një shkresë e cila sipas saj tregon se Belind Këlliçi ka qenë nxënësi me mesataren 9.7 dhe nisur nga këto rezultate është zgjedhur dhe President i Këshillit Studentor ne vitin 2004.
“Shkresa e shkollës, tregon se si në shumë raste të tjera, si një praktikë që e kanë ndjekur shumë nxënës për të vijuar studimet në SHBA, në Britani, apo Çeki, edhe në rastin e Belind Kelliçit, kjo ka ndodhur pas 4 viteve. Procesi i pranimit në Universitetin shtetëror të Marylend-it, është shumë serioz. Në Universitetin e Marylend-it, nuk ka asgjë të ngjashme me “Kinema Baldushkun” e Erjon Veliajt, dhe nuk blihet një pishë me 5 mijë euro.
Belind Kelliçi është pranuar, ka dhënë të gjitha provimet e standardizuara që kërkon procesi, ka marrë bursë, ka pasur rezultate të shkëlqyera, ka marrë 123 kredite, nga 120 që kërkon ligji atje, ka marrë medalje, është diplomuar me titullin “Summa Cum Laude” dhe është shpallur Studenti me mesataren më të lartë në diplomim”, tha ajo duke hedhur akuza ndaj kandidatit socialist për Bashkinë e Tiranës, Erion Veliaj.