Nëse vitet e fundit që pas fitores së Botërorit kanë shfaqur Gjermaninë me shumë luhatje në arenën ndërkombëtare, skuadra U21 e saj vazhdon të përsëritë veten me një ritëm mbresëlënës, pavarësisht se kjo kombëtare është e detyruar të ndryshojë brez lojtarësh çdo dy vite.
Sot, ekipi i drejtuar nga ish-futbollisti i njohur gjerman, Stefan Kuntz, ka mundur 2-1 Holandën dhe ka arritur të shkojë në finalen e Kampionatit Europian të kësaj grupmoshe për të tretin edicion radhazi. Edhe pse rezultati ishte i ngushtë, dominimi i Gjermanisë ishte i dukshëm, me dy gola por edhe me lojë, duke goditur edhe shtyllën në një ndeshje ku Mërgim Berisha, një emër i ndjekur për shumë vite nga Shqipëria dhe Kosova, luajti 83 minuta.
Për këtë ekip, kjo është prania për herë të tretë radhazi në finalet e Europianit, duke barazuar rekordin që mbahej nga Italia me praninë radhazi në vitet 1992, 1994 dhe 1996. Gjermania nisi këtë seri finalesh me një fitore në vitin 2017 ndaj Spanjës, duke u shpallur Kampione Europe, ndërsa u mund nga spanjollët dy vite më vonë. Tani, në finale përballë saj nuk do të jetë më Spanja, pasi ajo u mund nga Portugalia më rezultatin 1-0 dhe gjermanët do të mundohen të kthehen në fron në duelin e të dielës përballë luzitanëve.