Ish-kryeministri Sali Berisha është infektuar sërish me Covid.
Nga burime të ndryshme mësohet se ai nuk është ndjerë mirë ditët e fundit dhe ka kryer një tampon, i cili ka konfirmuar infektimin e tij me koronavirus.
Siç duket, infektimi shpjegon edhe mungesën e tij në takimet festive për përvjetoret e themelimit të Partisë Demokratike në Lushnjë dhe Kukës të zhvilluara dje dhe sot, ku në emër të Komisionit të Rithemelimit mori pjesë ish-Presidenti Bujar Nishani.
Gjithashtu, Berisha nuk ishte sot as pjesë e grupit të Komisionit të Rithemelimit që u paraqit në selinë e PD-së.
Kjo në fakt është hera e dytë që Berisha infektohet me Covid.
Pak ditë para ndërrimit të viteve, në një intervistë televizive ai bëri të ditur se e kishte kaluar Covid-in një herë dhe se ishte vaksinuar.
Infektimi i tij vë në pikëpyetje edhe pjesmarrjen në protestën e thirrur nga Komisioni i Rithemelimit të shtunën, më 8 Janar. Pjesëmarrja në këtë protestë do të varet nga gjendja e tij shëndetësore,, por nisur nga fakti se ai është infektuar ditët e fundit, prania e tij në këtë tubim vihet ne dyshim.