Humbjen drastike në zgjedhje lokale të 14 majit, Sali Berisha nuk e pranon. Në konferencën e përjavshme me gazetarët, Berisha thotë se zgjedhjet e 14 Majit në Elbasan janë farsa më e madhe në historinë e zgjedhjeve. Ai tha edhe se në Elbasan kanë votuar edhe fëmijët në moshën 10-vjeçare.
“Jam këtu për t’u njoftuar ju, se zgjedhjet në Bashkinë e Elbasanit janë një nga farsat më të mëdha në historinë e zgjedhjeve. Videot dëshmojnë se në mbi 70 përqind të qendrave të votimit, të ashtuquajturit operatorë, shkelën ligjin nga mëngjesi deri në darkë.
Ligji përcakton qëndrimin e tyre, distancën në të cilën ata qëndrojnë nga aparatura e votimit dhe këta militantë të PS-së, të përzgjedhur me kujdes, anëtarë të FRESSH, të trajnuar në sipërmarrjen e peshkut të Lucës, dhe të trajtuar nga Luca, janë treguar shkelës të ligjit, kriminelë elektoralë pothuaj në të gjitha qendrat e votimit. Janë lejuar të votojnë edhe fëmijë në moshën 10-vjeçare dhe kjo është filmuar”,-tha Berisha.