Kryetari i Partisë Demokratike, Sali Berisha, ka publikuar gjatë një konference për mediat disa pamje nga ambientet e brendshme të Kryeministrisë, ku sipas tij po kryhen punime rikonstruksioni dhe lyerjeje.
Berisha kritikoi ashpër ndërhyrjet në hollin e godinës, duke pretenduar se për këto punime po shpenzohen qindra mijëra euro dhe duke vënë në diskutim zgjedhjen e ngjyrave të përdorura.
“Së dyti, dua t’ju informoj se qindra mijëra euro po shpenzohen nëpër korridoret. Ju lutem shihni pak këtu çfarë po ndodh brenda ndërtesës së Kryeministrisë. Sulltani i kuq po vendos ngjyra haremi në Kryeministri”, deklaroi Berisha.
Ai shtoi se, sipas vlerësimit të tij, ngjyrat e përdorura janë të papërshtatshme për një institucion shtetëror.
“Po, këto janë tipike ngjyrat e haremeve. Dënoj me forcën më të madhe vendosjen e këtyre ngjyrave në hollet e Kryeministrisë. Urdhëroni sa kushtojnë dhe sa nuk kushtojnë. Këto ngjyra janë ose të haremeve ose të kinemave të seksit në Pigal. Atje i kam parë unë këto”, u shpreh kreu i PD-së.
Deri tani nuk ka një reagim nga Kryeministria lidhur me deklaratat e Berishës apo pretendimet për kostot e punimeve.