Kryetari i Partisë Demokratike, Sali Berisha, në një konferencë për gazetarët nga selia e PD-së, foli mbi vizitën e tij në Podgoricë, ku zhvilloi takime me eksponentë të rëndësishëm të politikës evropiane.
Gjatë qëndrimit në Mal të Zi, ai u takua me Manfred Weber, presidentin e Partisë Popullore Evropiane (PPE), si dhe me përfaqësues të tjerë të rëndësishëm të forcave të djathta në Evropë. Berisha e cilësoi këtë si një moment kyç për marrëdhëniet e PD-së me PPE-në dhe partitë simotra, duke e përshkruar si një zhvillim dramatikisht pozitiv.
“Pata një bisedë të frytshme me zv/presidenten e Forza Italia dhe me figura të tjera të spektrit të djathtë evropian. Mesazhet nga Podgorica janë mesazhe fitoreje për Partinë Demokratike,” – u shpreh Berisha.
Pas kthimit nga Mali i Zi, lideri i PD-së e vijoi angazhimin politik me një miting në Shkodër, të cilin e cilësoi si një nga më të fuqishmit që ka parë ndonjëherë Pallati i Sportit në këtë qytet. “Ishte mitingu më i zjarrtë që nga ndërtimi i tij e deri sot,” – tha ai.