Një nga çështjet kryesore të diskutimit në mbledhjen e grupit parlamentar të PD-së është ajo e arrestimit të McGonigal, ish-gjentit të FBI-së.
Në fjalën e tij, ish-kryeministri Sali Berisha hodhi akuza ndaj Edi Ramës, për të cilin tha se është i përfshirë në mënyrën më të pakontestueshme në një nga aferat më të zeza të kohërave.
Berisha shtoi se deputetët e PD do të ngrenë një komision hetimor për këtë çështje, pasi sipas tij kjo është “një aferë botërore”.
“Mblidhemi sot në një ditë kur Shqipëria është në epiqendër të një stuhie, e cila në memorien historike, nuk ka ekzistuar të paktën në 50 vitet e fundit. Shqipëria, Edi Rama, kreu i ekzekutivit është i përfshirë në mënyrën më të pakontestueshme në një nga aferat më të zeza të kohërave, në një akt që tejkalon çdo normë, çdo standard, çdo ligj,çëdo moral, çdo imagjinatë. De facto, ai ka përdorur si aset të tij, një nga njerëzit më të rëndësishëm të sistemit të sigurisë së SHBA, për definicion të botës së lirë, ish-shefin e kundërinteligjencës të FBI, një nga njerëzit më të besuar të asaj toke dhe atij vendi, Charles McGonigal. Me qëndrimin e tij të papërgjegjshëm, Edi Rama përpiqet të hiqet duarjashtë. Në një kohë kur aktakuza e botuar nga Ministria e Drejtësisë e SHBA, në 16 faqet e saj, të paktën 15 i kushtohen fund e krye, Edi Ramës, ish-oficerit të policisë sekrete, bashkëpunëtorit të SHISH, Agron Nezaj, këshilltarit në hije të Edi Ramës, Dorian Duçkës”, deklaroi Berisha.