Sali Berisha zhvilloi këtë të mërkurë një takim me komisionerin e Bashkimit Europian, Johannes Hahn. Siç njofton Zyra e Medias dhe Komunikimit në PD, takimi u zhvillua për të diskutuar mbi situatën politike dhe demokratike në Shqipëri.
“Në qendër të bisedës ishin shqetësimet e thella mbi gjendjen e demokracisë në vend, përfshirë kapjen e institucioneve, presionin ndaj opozitës, dhe largimin masiv të qytetarëve shqiptarë”, njoftoi PD.
Sipas kreut të PD, keqqeverisja ka sjellë një erozion të standardeve demokratike. ”Ngriti shqetësime edhe për heshtjen dhe qëndrimin pasiv të disa zyrtarëve në Bruksel dhe ambasadorëve të huaj, të cilët sipas tij kanë mbyllur sytë ndaj këtyre fenomeneve.
Komisioneri Hahn shprehu angazhimin e tij të plotë për të qenë një avokat i fortë për forcimin e demokracisë në Shqipëri dhe për të mbështetur integrimin europian të vendit.
Ai u zotua se do ta ngrejë zërin për të gjitha problematikat që janë ngritur nga Partia Demokratike dhe që janë pasqyruar në rezolutat e mbështetura nga Partia Popullore Europiane (PPE)”,-informon selia blu.