Kryetari i PD-së, Sali Berisha nuk e ka ftuar Lulzim Bashën në protestën e së shtunës. Berisha tha se kushdo mund të vijë në protestë, përveç ish-kryetarit të PD-së. Kjo pasi sipas Berishës, duhet që Basha të sqarojë akuzat për financimn e PD-së me paratë ruse.
“Të gjithë mund të vijnë, përveç Lulzim Bashës, i cili duhet të sqarojë akuzën e tmerrshme që ka. Të tjerët janë anëtarë të grupit, anëtarë të Partisë Demokratike, nuk mund të më marrin leje mua ata, që të protestojnë kundër qeverisë.
Lulzim Basha ka një akuzë të tmerrshme. Ka deklaruar që nuk është e vërtetë, por nuk ka dhënë asnjë fakt, asnjë provë dhe hetimi këtu nga selia po vazhdon.
Mendoj që është shumë i detyruar, të zbardhë, të ketë burrëri, ose të shpallet i penduar i drejtësisë dhe fiton lehtësim, por të tregojë të vërtetën”.