Edhe këtë të premte, kreu i Partisë Demokratike, Sali Berisha, gjatë konferencës me gazetarët në seli, tha se lufta kundër korrupsionit shkon drejt shuarjes përfundimtare. Berisha akuzoi drejtëpërdrejtë ministrin e Europës dhe Punëve të Jashtme, duke thënë se Olta Xhaçka po përdor pushtetin, lidhjet e saj me klanin Rama, si edhe lidhjet e kahershme.
“Unë para jush kam denoncuar një presion të jashtëzakonshëm që mafia e Edi Ramës, Olsi Ramës, Artan Gaçes, Olta Xhaçkës dhe Amant Josifit po bëjnë në Gjykatë Kushtetuese për të shpëtuar mandatin e një mafiozeje të pashoqe, siç është Olta Xhaçka. Olta Xhaçka, duke përdorur pushtetin, lidhjet e saj me klanin Rama, lidhjet e kahershme, se janë vërsulur Olsi, Edi, Artani, Josifi për të mposhtur Gjykatën Kushtetuese.
Një akt që do përbënte një akt të vërtetë ndaj Kushtetutës dhe goditje mëshire për luftën kundër korrupsionit. Çfarë thotë neni 70 i Kushtetutës? Deputetët nuk mund të kryejnë asnjë aktivitet fitimprurës që buron nga pasuria e shtetit. Olta Xhaçka me burrin e vet, kanë fituar statusin 5 milionë të investitorit strategjik.
Olta Xhaçka ka inkriminuar kunatën e saj amerikane si ortake në këtë aferë. Olta Xhaçka me këto veprime e ka vendin në burg dhe vetëm në burg. Dhe tani kërkon të shpëtojë”, deklaroi Berisha.