Për shkrimtarin dhe politikanin Besnik Mustafaj vendi shkon në zgjedhje të parakohshme në pranverë. Sipas tij, kushtet e vendosura nga Gjermania për çeljen e negociatave shkojnë detyrimisht drejt kësaj linje ndonëse nuk thuhet hapur.
Vetë fakti që Reforma Zgjedhore është e para nga 9 detyrat e Bundestagut, thotë Mustafaj, bën që përgatitjet janë për zgjedhje të parakohshme.
“Për mendimin tim Shqipëria do shkojë në zgjedhje të parakohshme në pranverë. Zgjedhjet më të afërta sipas kalendarit janë në vitin 2021. Por nisur nga rekomandimet e Gjermanisë, Reforma Zgjedhore vihet në krye të listës. Një njeri që lexon gjuhën e padeklaruar të ndërkombëtarëve besoj se do të arrinte në këtë përfundim”, u shpreh Mustafaj.
Duke folur për modelet e sistemit zgjedhor, ish-ministri i Jashtëm, Besnik Mustafaj tha se ai personalisht mbështet sistem proporcional me lista të hapura, ndërsa shtoi se sistemi maxhoritar nuk i përshtatet gjendjes aktuale ku ndodhet Shqipëria.