Binzesmeni i një kompanie në Berat është kallëzuar në polici pasi ka dhunuar inspektorët e AKU-së gjatë inspektimit.
Autoriteti Kombëtar i Ushqimit ka rinisur intensivisht kontrollet në vend për të kontrolluar bizneset për shkelje gjatë situatës nga pandemia e koronavirusit.
Biznesi në fjalë është ndëshkuar me tre gjoba për etiketim të produktit në kundërshtim me ligjin, mungesë të gjurmueshmërisë dhe pengim të procesit të inspektimit.
Njoftimi i AKU:
Administratori i një subjekti ushqimor në Berat është denoncuar në polici për ushtrim dhune ndaj trupës inspektuese të AKU-së gjatë ushtrimit të detyrës së saj në këtë subjekt.
Mbrojtja e shëndetit dhe jetës së konsumatorëve edhe në këtë situatë të vështirë që vendi po kalon është fokusi dhe qëllimi i veprimtarisë së pandalur të AKU-së dhe këtë e dëshmon edhe bashkëpunimi me qytetarët dhe ndërgjegjësimi i tyre për të denoncuar çdo shkelje të sigurisë ushqimore.
Kështu në sajë të indicios së ardhur nga konsumatorët për tregtimin e produkteve të paetiketuara në gjuhën shqipe, trupa inspektuese e Drejtorisë Rajonale të AKU Berat në zbatim të ligjit dhe në funksion të detyrës së saj, kreu inspektimin në subjektin “S. S” ku u konstatuan tregtimi i produkteve të pasigurta pasi subjekti nuk dispononte sistemin e gjurmueshmërisë si dhe u evidentuan 2184 shishe x 125 ml suko pjeshke dhe 2112 shishe x 200ml suko pjeshke në ambalazh TETRAPAC, të papajisura me etiketim në gjuhën shqipe.
Përballur në këto kushte përfaqësuesi i subjektit ka përkeqësuar situatën duke ushtruar dhunë ndaj inspektorëve ( pamje të regjistruara dhe nga kamerat e subjektit).
Trupa inspektuese kërkoi mbështetjen e forcave të Policisë së Shtetit, e cila shoqëroi në polici përfaqësuesin e subjektit duke mundësuar kryerjen e inspektimit normal nga inspektorët.
Për shkeljet e konstatuara në subjekt trupa inspektuese mori masat administrative përkatësisht:
1) Masë administrative “gjobë” me vlerë 100,000 lekë për etiketim në kundershtim me ligjin,
2)Masë administrative “gjobë” me vlerë 100 000 lekë për mungesë të sistemit të gjurmueshmërisë,
3) Masë administrative “gjobë” me vlerë 100.000 mijë lekë për pengimin e procesit të inspektimit.
Gjithashtu nga ana e trupës inspektuese është bërë dhe kallëzimi pranë instancave përkatëse për dhunën e ushtruar ndaj tyre nga ana e subjektit.
Autoriteti Kombëtar i Ushqimit në përputhje të detyrës së tij ligjore dhe në kuadër të luftës si pjesë e taksë Forcës për parandalimin e përhapjes së Covid-19 nuk do të lejojë asnjë rast abuzimi me çmimet dhe sigurinë ushqimore në vend.