Vijon të jetë kaotike situata e krijuar në aeroportin ndërkombëtar të Rinasit, pas grevës së kontrollorëve të trafikut ajror, që nisi një ditë më parë.
Mësohet se Ministrja Belinda Balluku ka kontaktuar me NATO-n për të zëvendësuar kontrollorët që janë në grevë.
Ndërkohë dhe AlbControl i ka bërë kërkesë për kontrollorë ajrore vendeve të tjera partnere teksa situata vijon të jetë e bllokuar në Rinas.
Sakaq, mbrëmë me kërkesë të ministrit përgjegjës për Infrastrukturën dhe Energjinë u mblodh Komiteti i Mbrojtjes Civile, organi i përhershëm i Emergjencave Civile për situatën e jashtëzakonshme të krijuar nga ndalimi i qarkullimit ajror nga ana e kontrollorëve të trafikut ajror.
KOMITETI VENDOSI:
- Ministria e Infrastrukturës dhe Energjisë të marrë masat e nevojshme për të bërë operacional kontrollin e trafikut ajror, qoftë edhe duke zëvendësuar nëse lind nevoja kontrollorët e larguar me kontrollorë të rinj vendas ose të huaj.
- Ministria e Infrastrukturës dhe Energjisë në kuadër të situatës së krijuar, të përcaktojë kriteret minimale të licencës sipas standardeve ndërkombëtare si dhe çdo kriter tjetër të nevojshëm për të filluar fluturimet sa më parë.
- Autoriteti i Aviacionit Civil të marrë të gjitha masat e nevojshme për rifillimin gradual të operimit ajror dhe në rast nevoje, të liçensojë në mënyrë të përshpejtuar kontrollorët e trafikut ajror në përputhje me urdhrin e Ministrit të Infrastrukturës dhe Energjisë.