Policia e Tiranës ka proceduar penalisht 15 shtetas, në vijim të hetimeve të zhvilluara pas tubimit të mbajtur në kryeqytet.
Sipas njoftimit zyrtar, ata dyshohen për veprat penale “Organizimi dhe pjesëmarrja në grumbullime e manifestime të paligjshme”, “Prishja e rendit dhe qetësisë publike” si dhe “Pengimi i qarkullimit të mjeteve të transportit”.
Nga veprimet hetimore ka rezultuar se tubimi, i njoftuar për t’u zhvilluar nga ora 19:00 deri në 22:00 në Sheshin “Skënderbej” dhe përgjatë bulevardit “Dëshmorët e Kombit”, është shtrirë edhe në akse të tjera rrugore të Tiranës, përfshirë Rrugën e Elbasanit, zonën e 9-Katësheve, ish-Bllokun dhe segmente të Unazës.
Policia bën me dije se gjatë zhvillimit të tubimit është bllokuar qarkullimi i automjeteve, ndërsa protesta ka vijuar përtej orarit dhe perimetrit të njoftuar zyrtarisht.
Në cilësinë e provës materiale janë sekuestruar një automjet dhe dy telefona celularë, ndërsa materialet procedurale i janë referuar Prokurorisë për vijimin e veprimeve të mëtejshme.