Njësia Administrative Lurë në Bashkinë e Dibrës është bllokuar sot për shkak të reshjeve të dendura të borës dhe erës së fortë.
Banorë të zonës u shprehën për tirananews.al se reshjet kanë nisur në orët e para të mëngjesit dhe vazhdojnë me intensitet të lartë, duke krijuar një trashësi mbi gjysëm metri.
“Rrugët që lidhin Lurën me Peshkopinë dhe Mirditën janë totalisht të bllokuara. Kemi ndërprerje të energjisë herë pas here. Asnjë mjet nuk mund të lëvizë në këto kushte. Për fat të mirë deri tani nuk kemi patur emergjenca shëndetësore as probleme në shtëpitë e banimit. Lurjanët çdo vit marrin masa për stinën e dimrit, sigurojnë ushqime për njerëzit dhe kafshët”, pohuan banorë të Lurës.
Prej muajsh ka nisur puna për rikonstruksionin dhe asfaltimin e rrugëve Perlat-Lurë dhe Arras-Lurë, gjë e cila do ta nxjerrë nga izolimi këtë krahinë të njohur.
