Pastori Akil Pano, ishte këtë të diel i ftuar në “Interview”, ku ka ndarë histori personale nga jeta e tij.
Ai ka treguar në një intervistë përballë Mirela Milorit se si nga një peshëngritës dhe boksier iu bashkua kishës dhe u bë pastor i Kishës Protestante Ungjillore.
“Isha boksier dhe peshëngritës. Në fund të ndryshimit të sistemit komunist ne stërviteshim te disa ambiente që ishin në fakt magazina të kishës ortodokse të rrugës së Kavajës. Në momentin e parë, kur priftërinjtë e kishës filluan të zëvendësonin objektet e palestrës, ne u bëmë kureshtarë se çfarë po ndodh. Kuptuam që objekti do të rivitalizohej.
Unë menjëherë mendova që mund ti ndihmoja pasi isha i krishterë dhe ortodoks. Mu rikthye historia e tregimeve të gjyshit. Pas çdo seance stërvitore unë shkoja në kishën ortodokse. Një ditë, një nga priftërinjtë e kishës, një burrë i vjetër, më jep një libër e më thotë ta lexoj se do gjeja diçka të rëndësishme.
Nuk e kisha idenë se po mbaja në dorë librin për të cilin gjyshi më kishte folur, nisa të lexoj Dhiatën e re të Biblës, e ndërsa kaloj kapitujt 4, 5, isha tërësisht i rrëmbyer. Dukej sikur Jezusi i Biblës kishte nisur tashmë të kishte një komunikim personal me mua. Po kuptoja që në mënyrë krejt graduale, Zoti më kishte thirrur me diçka që shumë njerëz e njohin si mistike, disa si një vokacion të brendshëm shpirtëror. Gjatë rrugëtimit gjithçka mori pamje, në 1992 u pagëzova nga grupi i Kishës Protestante Ungjillor”,-tha Pano.